Agri Hour
NK-boere ontvang droogtehulp─── ELSABÉ RICHARD 05:00 Mon, 30 Nov 2020
Sommige boere in die droogtegeteisterde Noord-Kaap het ná ‘n nege maande lange wag droogtehulpfondse vir voer ontvang.
Dit is volgens Reinette Liebenberg, DA provinsiale woordvoerder vir landbou. Liebenberg sê egter nie alle boere in droogtegeteisterde gebiede het dié fondse ontvang nie en dié wat dit wel ontvang het, het minder gekry as tydens die eerste uitbetaling van R36 miljoen. OFM-nuus se Elsabé Richard het met haar hieroor gesels…
Sien onderstaande PODCAST
Liebenberg sê die Noord-Kaap worstel steeds met die ergste droogte in 100 jaar en voeg by dat swak koördinasie van steun teenoor die boere na bewering die situasie in baie gebiede vererger het.
Sy sê daar is nog nie duidelikheid oor hoeveel geld beskikbaar gestel is nie en dat daar geld teruggehou is om waterbevoordeling ook toe te pas. Sy voeg by dat daar ook geld teruggehou is vir vervoer.
Intussen het die woordvoerder van die Noord-Kaap Departement van Landbou, Omgewingsake, Grondhervorming en Landelike Ontwikkeling, Zandisile Luphahla, vroeër aan OFM-nuus bevestig dat R36 miljoen van die Nasionale Rampbestuursfonds vir droogtehulp aan die provinsie toegeken is. Hy het verder bygevoeg dat die departement met administratiewe prosesse begin het, soos die indiening van aansoeke en om diensverskaffers te identifiseer. Die indiening van aansoeke vir droogtehulpbefondsing in drie droogtegeteisterde distrikte, naamlik Namakwa, Pixley ka Seme en ZF Mgcawu, het reeds op 16 Oktober 2020 gesluit.
Liebenberg voeg by dat ‘n verslag van die vroeë waarskuwingskomitee in Junie vanjaar aangedui het dat veral vier gebiede in die provinsie erg geraak word deur die huidige erge droogtetoestande. Hierdie gebiede sluit in Van Wyksvlei, Springbok, Loeriesfontein en Kenhardt, wat die afgelope vier jaar ondergemiddelde reënval gekry het.
| Reënval ontvang (mm) | |||||
| Gebied | Langtermyn Gemiddelde reënval | 2017 | 2018 | 2019 | 2020 |
| Springbok | 135 mm | 64 mm | 67 mm | 48 mm | 7 mm |
| Loeriesfontein | 220 mm | 81 mm | 109 mm | 78 mm | 27 mm |
| Kenhardt | 155 mm | 107 mm | 97 mm | 43 mm | 4 mm |
| Van Wyksvlei | 190 mm | 147 mm | 101 mm | 57 mm | 100 mm |
Verder het die party weer 'n beroep op die minister van Samewerkende Regering en Tradisionele Sake, Nkosazana Dlamini-Zuma gedoen, om die klassifikasie van ‘n droogteramp weer te verklaar. Dit kom nadat die hoof van die nasionale rampbestuursentrum, Mmaphaka Tau, op 16 Julie 2020 die klassifikasie herroep het, en om al hierdie gebiede wat steeds deur droogte geraak word, in die Staatskoerant to publiseer.
OFM-nuus
