Hierdie program gaan boei, uitdaag en inspireer. Dit bied ’n dinamiese mengsel van gevestigde en opkomende kunstenaars van dwarsoor die Vrystaat en Suid-Afrika, met werke wat temas soos identiteit, omgewing, geheue en verbeelding ondersoek.

“Sintuiglik Skeppend” is een van talle sielsvolle ervarings in die Scholtz-saal waar kreatiwiteit en welstand mekaar ontmoet. Foto: Vrystaat Kunstefees

Hoogtepunte van die program sluit in:

Toor | Bos
Hierdie multimedia-ervaring verweef visuele kuns, musiek, poësie en tegnologie om die ryk en uiteenlopende geskiedenis van Afrikaans te verken. Besoekers kan 'n unieke kombinasie van fisieke en skynwerklikheid verwag, met woudagtige natuurtonele deur die skilder Jaco van Schalkwyk en die woordkuns van Willem Boshoff, ondersteun deur klank en musiek deur komponis Jaco Meyer. 

Hierdie elemente dien as begeleiding vir die Afrikaanse digkuns van Bibi Slippers en Quaz Roodt.

Die projek is saamgestel deur die kurator dr. Dineke Orton en word tot lewe gebring in virtuele werklikheid deur ontwerper Herman Myburgh.

Die projek word tot lewe gebring in virtuele werklikheid deur ontwerper Herman Myburgh. Foto: Vrystaat Kunstefees

TEBELLO: The Night Piece
Kom ervaar iets heeltemal anders – ’n ervaring waaroor jy nog vir maande sal praat. Hierdie unieke ruimte vir sluimer, droom en slaapwandel ondersoek die toestand van moegheid, waarin jy meer ontvanklik en sensitief is. 

Die dramatiese eksperiment begin laat in die aand, met elke deelnemer wat hul eie bed het. Die ervaring eindig die volgende oggend met ’n gesamentlike ontbyt saam met die akteurs en ander deelnemers.

Sticks & Figures teken-werksessie
Ontwaak jou innerlike skeppingsdier in hierdie regstreekse figuurteken-werkwinkel. Met houtskool in die hand en klankgolwe wat jou verbeelding aanwakker, gaan jy lyne tot lewe bring – wild, vry en onvoorspelbaar. 

Geen ervaring is nodig nie, en geen perke word gestel nie. Kom net soos jy is: nuuskierig, oop en gereed om te ontdek. Of jy al jare lank teken of nog nooit ’n potlood vasgehou het nie – jy’s welkom. Basiese tekenmateriaal sal voorsien word, of jy kan jou eie materiaal saambring. Let wel: hierdie werksessie is beperk tot deelnemers van 18 jaar en ouer.

Die visuele kunste is ’n integrale deel van die fees se hartklop. Foto: Vrystaat Kunstefees

Michael Garbett, feesdirekteur, nooi almal uit om saam die kunstenaars te vier wat vandag se werklikhede vasvang en môre se gesprekke vorm.

“Die visuele kunste is ’n integrale deel van die fees se hartklop. Ons is trots daarop om ’n platform te skep waar kunstenaars nie net hul werk kan uitstal nie, maar ook kritiese gesprekke kan voer en gemeenskappe kan inspireer,” sê Garbett.

Mediaverklaring cg