Die sersant, verbonde aan Vioolsdrift se grenspolisiëring, het Vrydag (12/26) saam met twee ander mense in die bergagtige gebied gaan stap. Die ander twee het daarin geslaag om veilig terug te keer maar daar was geen teken van die sersant nie.

Die voorval is omstreeks 22:00 by die polisie aangemeld, waarna 'n soektog onmiddellik begin is. Weens die donkerte en die gevaarlike terrein is die soektog opgeskort en weer die volgende dag vroegoggend om 06:00 hervat.

Die Noord-Kaapse polisiewoordvoerder lt.-kol. Thabo Litabe, sê die vermiste beampte het daarin geslaag om sy gesin gedurende die nag te kontak.

Foto: Facebook/SAPD

“Gedurende die nag het die vermiste lid telefonies kontak met sy vrou gemaak en haar meegedeel dat hy veilig is en besluit het om oornag in die berge te bly om verdere disoriëntasie of beserings te vermy.”

Bystand is verleen deur die lugvleuels van Gauteng, die Wes-Kaap en die Noord-Kaapse polisie, terwyl lede van die grenspolisie, plaaslike polisielede, Springbok se K9-eenheid, soek- en reddingspanne, plaaslike nooddienste, TransEx-helikopterdiens en lede van die publiek ook help soek het.

Die soekgeselskap het die beampte later Saterdag suksesvol opgespoor. Hy is ongedeerd gevind en het sedertdien veilig huis toe gekeer

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus   cvdw