Die land het teen Donderdag (17/9) 18 bevestigde en een waarskynlike geval aangeteken, die meeste in die Wes-Kaap. Die departement waarsku 13 gevalle is sedert 13 Augustus aangemeld, wat op vinnige plaaslike verspreiding dui.

Die Wes-Kaap het 15 gevalle aangeteken, hoofsaaklik in Kaapstad, terwyl Gauteng drie en KwaZulu-Natal een geval het. Die pasiënte is tussen 23 en 50 jaar oud. Altesaam 18 van die 19 gevalle is mans.

Een van die jongste gevalle behels iemand wat vroeër in September na Spanje gereis en Maandag na Suid-Afrika teruggekeer het. Hy is daar getoets nadat hy oor sy waarskynlike status ingelig is. Suid-Afrikaanse en Spaanse gesondheidsamptenare wag nog op bevestigende laboratoriumuitslae.

’n Verteenwoordiger van die Wêreldgesondheidsorganisasie oorhandig ’n pakkie met noodhulp aan ’n gesondheidswerker in Suid-Afrika. Foto: WGO

Die komende weke sal vroeë opsporing en vinnige optrede belangrik wees om verdere verspreiding te beperk. Enigiemand wat binne die voorafgaande 21 dae noue kontak met ’n bevestigde of vermoedelike geval gehad het, behoort veral op simptome te let, sê Foster Mohale, departementswoordvoerder.

Aappokke kan koors, hoofpyn, spierpyn, rugpyn, moegheid en ’n veluitslag of letsels veroorsaak. Die letsels kan op die gesig, hande, voete, geslagsdele of ander liggaamsdele voorkom en ontwikkel gewoonlik van plat rooi kolle in knoppe, blasies en later korsies.

Simptome verskyn gewoonlik ses tot 13 dae ná blootstelling, maar kan reeds ná vyf dae of eers tot 21 dae later voorkom. Mense met simptome, veral ná noue kontak met ’n moontlike geval, moet mediese hulp kry en noue kontak met ander vermy.

Enigiemand kan geraak word

Aappokke kan enigeen raak, ongeag ras, geslag, seksuele oriëntasie of sosio-ekonomiese status. Die departement waarsku daarom teen aannames oor wie besmet kan word, omdat stigma mense kan ontmoedig om betyds mediese hulp te soek en sodoende pogings om ’n uitbreking te beheer kan ondermyn.

Die virus versprei hoofsaaklik deur noue fisieke kontak, insluitend vel-tot-vel-kontak met uitslag of letsels. Besmette beddegoed, klere en handdoeke kan ook ’n rol speel, terwyl langdurige aangesig-tot-aangesig-kontak en onbedekte hoes of nies verdere verspreiding kan veroorsaak.

Gereelde handewas of ontsmetting bly ’n eenvoudige manier om die risiko te beperk. Waaksaamheid is veral nodig in huishoudings, gesondheidsinstellings en hegte sosiale netwerke, terwyl mense wat positief toets of vermoedelik besmet is, ondersteuning eerder as stigma nodig het.

Die regering het met steun van die Wêreldgesondheidsorganisasie beperkte hoeveelhede MVA-BN-entstof en die behandeling Tecovirimat bekom. 

Gesondheidsamptenare sal besluit waar en hoe dié voorraad gebruik word om uitbrekings te stuit. Inenting sal egter steeds saam met ander voorkomingsmaatreëls gebruik moet word.

Die departement vra dat mense met simptome vinnig hulp soek, kontak beperk en nie uit vrees vir stigma toetsing of behandeling uitstel nie, terwyl plaaslike waaksaamheid nou belangriker word.

OFM Nuus cvs

• Het jy ’n nuuswenk om te deel? Bel of whatsapp die OFM Nuus-lyn 066 487 1427.