In Suid-Afrika word ongeveer 1 000 kinders en tieners jaarliks met kanker gediagnoseer. Vroeë identifisering van moontlike waarskuwingstekens kan ’n belangrike rol speel om te verseker dat kinders so gou moontlik die nodige mediese sorg ontvang.

Choc se Have a Heart-veldtog fokus vanjaar op die herkenning van hierdie tekens, die deel van betroubare inligting en ondersteuning aan kinders en gesinne wat deur ’n kankerdiagnose geraak word.

Van die waarskuwingstekens waarna ouers en versorgers kan oplet, sluit in onverklaarbare of aanhoudende koors, gewigsverlies, moegheid, bleekheid, ongewone kneusing of bloeding, knoppe of swelling, been- of gewrigspyn, veranderinge in sig en sekere neurologiese simptome soos aanhoudende hoofpyne, veranderinge in balans of loop, of veranderinge in spraak in.

Hierdie simptome beteken nie noodwendig dat ’n kind kanker het nie, maar wanneer simptome onverklaarbaar, aanhoudend of erger word, behoort ’n gesondheidswerker geraadpleeg te word.

Choc se werk gaan egter veel verder as bewustheid. Die organisasie bied ondersteuning aan kinders, tieners en hul gesinne, onder meer deur verblyf naby behandelingsentrums, vervoer, emosionele en praktiese ondersteuning en opvoedkundige programme.

Sonet van Zyl, streekbestuurder van Choc in die Vrystaat en Noord-Kaap, sluit by Yolanda Maartens aan om meer te vertel oor kinderkanker, die waarskuwingstekens en die belangrike rol wat die Choc-huis in Bloemfontein vir gesinne in die streek speel.

Hierdie September is die boodskap eenvoudig: Leer die tekens. Dra goud. Deel hoop. Ondersteun gesinne.

Besoek Choc Childhood Cancer Foundation SA of skakel 0800 333 555 vir meer inligting. sm