Local News
Rentekoerse kan binnekort dalk weer styg─── 17:52 Thu, 13 Aug 2009
Alani Janeke
Johannesburg - Ekonome verwag dat rentekoerse binne die volgende paar maande weer kan begin styg. Dit volg na die President van die Reserwebank, Tito Mboweni, vanmiddag aangekondig het dat rentekoerse volgende maand met 50 basispunte gaan verlaag. Die prima-uitleenkoers sal dan na 10.5% verlaag, terwyl die terugkoopkoers sewe persent sal wees. Die Efficient-groep se Freddie Mitchell sê hulle verwag dat dit die laaste daling vir die jaar sal wees. Intussen meen kenners die rentekoersverlaging gaan 'n baie positiewe invloed op die huismark hê. Volgens ABSA se Jaques du Toit is rentekoerse sedert Desember verlede jaar met 500 basispunte gesny, en is hulle nou op dieselfde vlakke as in 2006, voor hoë inflasie rentekoerse opwaarts gedryf het. Hy sê hoewel dit tyd neem vir die verlaging om na verskeie sektore deur te syfer, meen hulle dit sal die huismark stimuleer.
