Suid-Afrikaanse aandele, asook die Rand, het gestyg nadat beleggers ’n ooreenkoms tussen mededingende politieke partye verwelkom het om die herverkiesing van Cyril Ramaphosa as president te ondersteun. Dit ná die ANC en die DA verlede week ’n raamwerkooreenkoms onderteken het om ’n regering van nasionale eenheid te vorm.  

Dr. Christo van der Rheede, adjunkprofessor aan die Universiteit van die Vrystaat se Fakulteit Ekonomie en Bestuurswetenskappe, meen politieke partye moet hul verskille ter syde stel om ’n koalisie suksesvol te maak, anders toon hulle min begeerte om die land te dien.

Verder stel hy voor dat partye wat die Grondwet ondersteun en daartoe toegewyd is, saamwerk om ’n regering van grondwetlike eenheid te vorm en beklemtoon die belangrikheid van eenheid onder gematigde partye, veral met die komende plaaslike en nasionale verkiesings.

“Indië het ’n regering van nasionale eenheid suksesvol gevestig deur beginsels neer te lê wat fokus op ekonomiese groei, wet en orde, effektiewe regering, en die aanstelling van die beste mense. Hierdie beginsels kan ook in Suid-Afrika toegepas word om ’n pragmatiese buitelandse beleid te ontwikkel en globale vennootskappe te vorm.”

Suid-Afrika het egter ’n geskiedenis van goeie beleid, maar swak implementering. Van der Rheede glo dat ’n koalisie tussen die ANC en die DA hier van waarde kan wees. “Terwyl die ANC die statuur van ’n bevrydingsorganisasie het, beskik die DA oor die administratiewe vaardighede om beleidstellings effektief te implementeer. Dit vereis egter dat Suid-Afrika wegbeweeg van kaderontplooiing en meritokrasie-gebaseerde aanstellings implementeer.”

Verder moet korrupsie sterk aangespreek word, aangesien dit een van die grootste struikelblokke vir vooruitgang in die land is. “Die regte mense moet aangestel word om beleid te implementeer om verarming, verdeeldheid, en polarisering te voorkom.”

Laastens beklemtoon Van der Rheede die belangrikheid van burgerlike verantwoordelikheid in ’n demokrasie. Hy waarsku teen die fout om te dink dat demokrasie ’n eenmalige gebeurtenis elke vyf jaar is. “Burgers moet aktief betrokke wees, hulle verteenwoordigers tot verantwoording roep, en gemeenskappe moet saamwerk oor grense heen om dorpe skoon te maak, gehalte opvoeding te verseker, en nuwe besigheidsgeleenthede te skep.”

OFM Agri cg