Louis de Jager, ‘n toegewyde boer tussen Wesselsdorp en Smithfield, deel sy inspirerende verhaal van ‘n lewe geanker in landbou. Hy en sy vrou, Ronel, bestuur hul plaas met passie, terwyl hul seun, Louis Junior, die koshuislewe in Zastron ervaar maar gereeld huis toe kom om die buitelewe en boerdery te geniet.

Louis se eerste herinneringe aan landbou is diep ingeëts in sy geheue. “Hoewel ek nie op ‘n plaas grootgeword het nie, onthou ek nog steeds die kraakvars winteroggende en die reuk van reën op die grond. Een van my kosbaarste herinneringe is die eerste bok wat ek saam met my pa geskiet het,” sê Louis met ‘n glimlag.

Louis se pa, Lulu de Jager, was ‘n prominente figuur in die Vrystaatse landbougemeenskap. Hy het gehelp om die Vrystaat Landbou Jongboer-konferensie te stig en was ‘n pionier in georganiseerde landbou. Louis onthou: “My pa het meeste van sy wysheid gedeel deur die voorbeeld wat hy gestel het. Hy het altyd gesê dat as jy moeg raak, moet jy net jou spoed hou en nie afklim nie. Dit is ‘n les wat ek steeds toepas in tye van hoë insetkostes en lae kommoditeitspryse.”

Vir Louis en Ronel is dit belangrik dat hul seun, Louis Junior, blootgestel word aan die plaaslewe. “Dit is ‘n voorreg om ‘n kind op ‘n plaas groot te maak. Hy verstaan die siklus van die lewe, van geboorte tot dood. Louis Junior help gereeld met kalfies en lammetjies, en leer so verantwoordelikheid en integriteit,” verduidelik Louis

Louis de Jager, sy seun Louis de Jager jr., en sy pa, Lulu de Jager. Foto verskaf

Louis is optimisties oor die toekoms van landbou in Suid-Afrika. “Landbou sal altyd ‘n toekoms hê omdat kos ’n noodsaaklikheid is. Dit gee my hoop dat ons altyd ‘n plek in die wêreld sal hê,” sê hy.

Een van die grootste lesse wat Louis in sy loopbaan geleer het, is om stadig en doelgerig te groei. “Begin klein en moenie te vinnig probeer groei nie,” sê hy. Hy beklemtoon ook die belangrikheid van ‘n passie buite werk: “Jy moet iets hê wat jou inspireer en jou gedagtes verfris, of dit nou visvang, jag, of lees is.

‘Dit begin by jou’ 

Louis sluit af met ‘n inspirerende boodskap: “Wees die verandering wat jy in die wêreld wil sien. Dit begin by jou en het ‘n rimpel- en domino-effek op ander.”

Sy verhaal is ‘n getuienis van deursettingsvermoë, liefde vir landbou en die belangrikheid van familie en tradisie in die bou van ‘n beter toekoms.

OFM Nuus cg