Die kompetisie, georganiseer deur Agri-Expo, is oop vir alle vervaardigers en klein ondernemings regoor die land. 

Deelnemers kan inskryf in bykans 200 klasse, waaronder konfyt, marmelade, blatjang, piekels, pesto’s en ander vrugte- en groenteprodukte. Volgens Breyton Milford, hoofbestuurder van Agri-Expo, is die kampioenskap nie net ’n platform vir erkenning nie, maar ook ’n manier om innovasie en uitnemendheid in die kuns van preserveerwerk aan te moedig. 

“Dis ’n gulde geleentheid vir deelnemers om met ander rolspelers in die sektor te netwerk,” sê Milford.

Susina Jooste, ’n kulinêre opvoedingspesialis, sal as hoofbeoordelaar optree. ’n Blinde proeproses en onafhanklike oudit sal sorg vir objektiewe beoordeling.

Inskrywings sluit op 25 Junie, met laatinskrywings tot 1 Julie. Produkte moet op 21 of 22 Julie by Eensgezind naby Durbanville afgelewer word. Die beoordeling vind op 23 Julie plaas, met die toekenningsgeleentheid geskeduleer vir 6 Augustus.

Die inskrywingsfooi beloop R150 (BTW uitgesluit), met laatinskrywings teen R250. Inskrywings geskied aanlyn by www.sapreservechamps.co.za.

OFM Agri mvh