Die winter het stadig begin met vermindering in temperature en die aankoms van kouefronte, met sneeuneerslae wat in hoogliggende gebiede aangemeld is.

Somerreënvalgebiede het oor die algemeen goeie reën gehad, wat veld- en veetoestande redelik tot goed gelaat het. Somergewasse is geoes en wintergewasse is besig om geplant te word, terwyl die gemiddeldes van groot damme in die meeste provinsies steeds hoog is.

Volgens die Seisoenale Klimaatvooruitskatting van 4 Junie 2025, wat deur die Suid-Afrikaanse Weerdiens uitgereik is, word bo-normale reënval gedurende die middel van die winter vir die suidwestelike dele van die land en oostelike kusgebiede voorspel. Die res van die land sal waarskynlik onder-normale reën ontvang.

Teen laatwinter en vroeë lente word slegs in die oostelike kusgebiede bo-normale reën verwag, terwyl die vooruitsig vir die suidweste verander na onder-normaal. Minimum en maksimum temperature word oorwegend bo die norm verwag, met uitsonderings aan dele van die suidelike kus waar dit onder normaal kan wees.

Raad aan produsente

Wintergraanboere word aangeraai om vir voldoende vog te wag voordat daar geplant word, en binne die normale plantvenster te bly. In gebiede waar bo-normale reën voorspel word, moet daar in gedagte gehou word dat verspreiding moontlik ongelyk kan wees. Boere in besproeiingsgebiede moet hul aanplantings aanpas volgens plaaslike waterbeperkings.

Boere word verder aangemoedig om gereeld weer- en klimaatvoorspellings dop te hou en besluite in lyn daarmee te neem. Hulpbronne moet spaarsamig gebruik word, in ooreenstemming met die Bewaringswet op Landbouhulpbronne, Wet 43 van 1983.

Veeboerdery en brandrisiko’s

Namate die veld opdroog, moet veeboere dieregetalle verminder in oorbeweide gebiede en weidingsrotering toepas. Byvoeding en lekke is noodsaaklik, asook inentings volgens geskeduleerde roetines. Genoegsame drinkwater en skuiling teen strawwe weerstoestande moet voorsien word.

Met die toenemende risiko van veldbrande word daar klem gelê op die skep en instandhouding van brandbreuke. Kouefronte kan koue episodes en plaaslike oorstromings veroorsaak. Boere moet paraat wees vir uiterste weerwaarskuwings, soos yskoue toestande, swaar reën en brandgevaar, en toepaslike strategieë in plek hê soos in vroeë waarskuwings uitgelig.

Die departement van landbou sal voortgaan om saam met belanghebbendes boere bewus te maak van hierdie risiko’s en hulle op te lei in die gebruik van vroeë waarskuwingsinligting vir ramprisikovermindering.

OFM Agri