Die departement is R7,6 miljard vir die 2025/26-boekjaar toegeken, wat 'n vermindering is van die vorige jaar se R7,9 miljard. Oor die mediumtermyn word daar egter verwag dat die begroting met 1,2% per jaar tot R8,2 miljard teen 2027/28 sal toeneem.

Volgens Steenhuisen is die skeiding van die departement van grondhervorming en landelike ontwikkeling ’n keerpunt wat groter responsiwiteit en doeltreffendheid moontlik maak. 

Die departement het sewe strategiese prioriteite uitgestippel, insluitend sterk vennootskappe, marktoegang, biosekuriteit en voedselsekerheid.

Hoogtepunte sluit in

• ’n Biosekuriteitsraamwerk en -raad om stelselmatig ramprisiko’s soos bek-en-klouseer te hanteer: Vyftig veegesondheidstegnici sal ontplooi word, en samewerking met die Universiteit van Pretoria se Biosekuriteitsentrum word uitgebrei.
• Voedselsekerheid en jeugontwikkeling: Die departement implementeer die 2024–2029 Nasionale Voedsel- en Voedingsekuriteitsplan, en fokus op tuingebaseerde produksie, tradisionele gewasse en die opleiding van jong landboukundiges.
• Landboukolleges word hervorm: Alle 11 landboukolleges sal in die hoëronderwysstelsel geïntegreer word om jongmense beter voor te berei vir ’n moderne, klimaatslim sektor.
• Handel en marktoegang: ’n Nuwe marktoegangstrategie word gefinaliseer, en onderhandelinge is aan die gang vir uitvoere na Asië en die Midde-Ooste. Die departement verdedig terselfdertyd Suid-Afrika se posisie binne AGOA en EPA.
• Beleggings in tegnologie en bestuur: Die nuwe Landbou Digitale Platform sal met hulp van die VN se Voedsel- en Landbou-organisasie ontwikkel word, en ’n nasionale produsentportaal word vanjaar in werking gestel.

Steenhuisen beklemtoon dat landbou-ontwikkeling nie net van die staat afhang nie. Hy noem openbare-private vennootskappe as die sleutel tot skaal, innovasie en insluiting. 

“Soms is die mees doeltreffende ding wat die regering kan doen, om uit die pad te staan.”

Hy sluit die begroting af met ’n beroep op eenheid en daadkrag: “Ons begin nie van voor af nie. Ons bou op ’n sektor wat werk en wat gereed is om verder te groei.”

OFM Agri mvh