Die plaaslike witmielieprys het die afgelope week skerp gestyg tot R5 095/ton, met die geelmielie spotprys wat op R4 247/ton te staan kom. Sojabone het egter gedaal na R7 165/ton, terwyl sonneblom met R394 gestyg het na R9 535/ton. Koringpryse het tot R6 520/ton geklim.

Internasionaal bly mieliepryse onder druk weens ’n verwagte rekordoes van 15,7 miljard bushels in die VSA – moontlik selfs tot 16,1 miljard. Brasilië verwag ook ’n rekordoes van 132 miljoen ton, wat wêreldvoorrade verder vergroot.

“Hierdie groot wêreldvoorrade plaas druk op CBOT-pryse. Tensy ons ’n droogte met hittegolwe sien, gaan pryse nie sommer herstel nie,” sê Van der Merwe.

Plaaslike tekorte stoot witmielieprys op

Ten spyte van internasionale druk bly Suid-Afrikaanse pryse hoog, veral vir witmielies. Slegs 66,8% van witmielies is tot dusver as graad 1 geklassifiseer – ’n groot afname teenoor 97% verlede jaar. Gradering- en stroopprobleme het verdere druk op aanbod geplaas.

“Markte reageer asof graad 2 en 3-witmielies eenvoudig nie bestaan nie – en dit dryf pryse op.”

Geelmielies toon ’n soortgelyke tendens met 15,2% laer lewerings as verlede jaar; witmielies is 12% agter.

Speenkalfpryse klim, maar slagpryse daal

Die nasionale speenkalfprys het met 2,5% gestyg tot R36,51/kg vir kalwers tussen 200 en 250 kg. Die top 40%-groep bereik R39,11 en die top 10% selfs R43,97. Ligte kalwers verhandel teen R35,34, swaarder kalwers teen R37,02.

Die A2/3-beeskarkasprys het gedaal na R76,76/kg, met C-grade op R56,69/kg. Supers pryse daal vinnig, in sommige gebiede reeds tot R67, en C-grade tot R54, weens groter aanbod en swak verbruikersvraag.

“Speenkalfpryse kan waarskynlik tot einde Augustus standhou, maar verhoogde slagtings kan pryse onder druk plaas.”

Lammark stabiel, ligte daling verwag

Stoorlampryse het met 2% gestyg tot R49,97/kg. In die Vrystaat verhandel lamme teen R51,22 en in die Noord-Kaap teen R47,07/kg. Slaglamme staan op R47,89/kg.

Die A2/3-lamkarkasprys is tans op R105,76, met C2/3-pryse op R71,76. ’n Ligte prysdaling teen einde Julie word verwag, maar dit sal na verwagting minimaal wees.

OFM Agri cg