Volgens dr. Mariaan Wicks van die Noordwes-Universiteit lê die antwoord daarin om kinders reeds van hul babadae af bloot te stel aan natuurlike, ongegeurde en onversoete kosse. “Voedselvoorkeure word baie vroeg in die lewe vasgelê en word oorgedra na ons tiener- en volwasse jare.”

Wicks beveel aan dat ouers kleingoed aan ’n wye verskeidenheid geure en teksture blootstel, en om verwerkte en versoete produkte so ver moontlik te beperk. “Kies liewer natuurlike kosse – dit maak gesonde keuses later in die lewe baie makliker.”

Beplanning is sleutel vir gesonde kosblikke

Een van die grootste uitdagings vir ouers is gesonde kosblikke. Wicks se raad is eenvoudig: beplan vooruit. Sy stel voor dat die ouer op ’n Sondagmiddag die inhoud van die yskas en koskas nagaan, en ’n spyskaart vir die week opstel. Die oorskietkos van die aandete kan dikwels in die volgende dag se kosblik beland – soos maalvleis op ’n broodjie, skoon pasta met stukkies vleis, of ekstra gesnyde groente.

“Toebroodjies met grondboontjiebotter of kaas bly gewild, maar vermy hoogs verwerkte gerieflikheidskosse – dit is duurder en bevat dikwels te veel sout en suiker.”

Wat om in te sluit – en te vermy

’n Gebalanseerde dieet vir kinders moet groente, vrugte, suiwelprodukte, maer vleise en volgrane insluit. “Groente en vrugte voorsien essensiële vitamiene, minerale en vesel; suiwel bied proteïen en kalsium vir gesonde groei; en volgrane verskaf energie en verdere vesel.”

Sy raai ouers aan om hoogs verwerkte kosse, ryk aan suiker, sout en versadigde vette, tot ’n minimum te beperk. ’n Goeie riglyn is om 70% tot 80% van die tyd gesonde, heelkos-opsies te kies en die res vir spesiale bederfies te hou.

Wicks se kernboodskap is duidelik: Gesonde eetgewoontes begin vroeg – en met ’n bietjie beplanning kan dit maklik in die gesin se roetine inpas.

OFM cvs