Die grootste probleem vir primêre veeprodusente is nie die siekte self nie, maar die ernstige ekonomiese gevolge daarvan. In ekstensiewe omstandighede toon diere dikwels net ligte simptome en herstel hulle volledig. 

Produsente kan egter nie aan normale markkanale deelneem voordat diere ingeënt is nie.

Diere mag slegs ná inenting geslag word, wat veral beesprodusente tref en dit moeilik maak om speenkalwers te verkoop. Dit skep in praktyk ’n kommoditeit sonder ’n funksionerende mark.

Bek-en-klouseer het ’n enorme invloed op die waardeketting. Foto: Pexel

Bek-en-klouseer ontwrig ook die breër rooivleiswaardeketting. Voerkrale moet vir lang tydperke onder kwarantyn bly, wat bottelnekke en prysversteurings veroorsaak. 

Die hele bedryf word deur die krisis verlamm, en ’n dringende oplossing was nodig.

Volgens die RPO maak die entstofplan, soos aangekondig deur John Steenhuisen, minister van landbou en landelike ontwikkeling, dit moontlik om ’n meer volhoubare pad vorentoe te volg. Die organisasie beskryf dit as die eerste daadwerklike stap in die regte rigting.

Plan word werklikheid

Die RPO en ander waardekettingvennote het lank met die regering onderhandel om aksie te kry. Die nuwe plan kan marktoegang vir speenkalfprodusente herstel, voerkrale weer in werking stel en die vloei van rooivleisprodukte normaliseer.

“Ons besef daar lê nog baie werk voor om dit ’n werklikheid te maak,” sê dr. Frikkie Maré, uitvoerende hoof van die RPO. “Ons is egter dankbaar dat die grondslag reeds gedeeltelik gelê is, onder meer deur die identifisering van moontlike entstofverskaffers.

“Noudat daar ’n plan op die tafel is, moet die oorblywende werk, soos die wysiging van regulasies, afgehandel word om dit te implementeer. Die RPO bevestig graag ons bereidwilligheid om die regering op enige manier te ondersteun.”

OFM Agri/Isabel van Tonder mvh