Die jongste optrede by Pudimoe het tot die terugvind van 61 gesteelde diere gelei nadat drie verdagtes vasgetrek is. Dit volg kort op ’n vorige voorval by dieselfde veepos waar ’n polisiehommeltuig gehelp het om nóg 57 gesteelde diere op te spoor.

In die jongste voorval is 46 bokke en 15 skape deur die verdagtes buitgemaak. Polisie het ook op ’n wit Mahindra-bakkie, selfone en ’n vee-kwitansieboek beslag gelê, wat deel van die ondersoek sal vorm, sê konst. Thuto Bobelo, Noordwes-polisiewoordvoerder.

Aanvanklik is ’n veewagter by ’n veepos agter die gehuggie Khaukhwe aangeval. Hy het daarin geslaag om te ontsnap en die eienaar van die vee te waarsku, waarna die voorval onmiddellik by die polisie aangemeld is.

Polisie het plaaslike boere wat deel is van die Stock Theft Information Centre (Stics), asook lede van openbareorde-polisiëring, by die soektog betrek. 

Beamptes het later ’n verdagte bakkie opgespoor en die bestuurder in hegtenis geneem voordat hulle die voertuig gebruik het om die ander twee te uitoorlê.

Beamptes het voorgegee dat hulle die gesteelde vee kom haal en met die voertuig na ’n geïdentifiseerde kraal gery. Twee verdagtes wat daar gewag het om die vee te laai, is aangekeer en al 61 diere is aan hul wettige eienaar terugbesorg.

In die jongste voorval is 46 bokke en 15 skape gesteel. Foto verskaf

Die voorval is die tweede in ’n kort tydperk by dieselfde veepos. In die vorige saak op 8 September het ’n polisiehommeltuig en samewerking tussen die polisie en ander rolspelers gehelp om 42 bokke en 15 skape terug te vind.

Vinnige aanmelding, samewerking tussen die gemeenskap en polisie, en die gebruik van beskikbare tegnologie sal belangrik bly om toekomstige veediefstal te bekamp, sê lt.genl. Arthur Peter Adams, Noordwes-polisiekommissaris.

Die drie verdagtes staan tereg op aanklagte van veediefstal en die besit van vermoedelik gesteelde vee. Die ondersoek duur voort en verdere aanklagte kan volg namate polisie die twee voorvalle en moontlike verbintenisse verder ondersoek.

OFM Agri cvs

• Deel jou landbounuus: agri@ofm.co.za.