David Maynier, minister van bosbou, visserye en omgewing, het 18 eiendomme tussen Nqanqarhu (Maclear) en Rhodes formeel as die Grasslands National Park, oftewel Nasionale Grasveldpark, verklaar. Die gebied beslaan altesaam 10 225,9242 ha en is ingevolge ’n kennisgewing in die Staatskoerant tot nasionale park verklaar.

Die park moet onderverteenwoordigde grasland-ekostelsels beskerm en sluit ook ’n deel van die Oos-Kaapse Drakensberg- Strategiese Waterbrongebied in. Die landskap is volgens die departement belangrik vir watersekerheid, biodiversiteit en die bestaansmiddele wat afhanklik is van die streek se produktiewe landbougrond.

Sanparke sal die nuwe park bestuur. Die verklaring volg op ’n kennisgewing van voorneme wat reeds in 2025 gepubliseer is en die afhandeling van die statutêre proses ingevolge die Wet op Nasionale Omgewingsbestuur: Beskermde Gebiede.

’n Belangrike verskil met tradisionele nasionale parke is dat die Nasionale Graslandpark hoofsaaklik deur biodiversiteitsrentmeesterskap tot stand gekom het. Deelnemende grondeienaars behou eienaarskap van hul grond, maar verbind hulle tot ooreengekome bewarings- en bestuurspraktyke.

Landboubedrywighede wat met die bewaringsdoelwitte versoenbaar is, kan steeds voortgaan. Dit beteken dat die park nie noodwendig produktiewe grond uit boerdery onttrek nie, maar eerder probeer om langtermynbewaring en plaaslike landbou-ekonomieë met mekaar te versoen.

Die verklaring is ’n belangrike stap om een van Suid-Afrika se minste beskermde biome en ’n strategiese waterbronlandskap te bewaar. Maynier sê die model wys ook hoe produktiewe grondgebruik en natuurbewaring mekaar deur vrywillige langtermynvennootskappe kan versterk.

Die dorpie Rhodes is die hele jaar skouspelagtig. Foto: Christo van Staden

WWF Suid-Afrika het saam met die departement, Sanparke en verskeie ander vennote ’n leidende rol gespeel om die park tot stand te bring. Die nuwe model kan vorentoe ook as voorbeeld dien vir ander gebiede waar belangrike biodiversiteit op privateat of produktiewe landbougrond voorkom.

Maynier beskryf dit as die eerste nasionale park wat hoofsaaklik deur ’n biodiversiteitsrentmeesterskapmodel gevestig is. Die volgende fase sal nou wees om die ooreengekome bestuursreëlings in werking te stel terwyl landbou wat met bewaring versoenbaar is, steeds in die gebied voortgaan.

OFM Agri cvs dg cvs

• Deel jou landbounuus: agri@ofm.co.za.