Geen ander wildspesies in die park toon tans kliniese tekens van die siekte nie. Deur Sanparke se wildgesondheidsmoniteringstelsel is ’n toename in mankheid onder koedoes opgemerk.

Aanvanklike toetse was negatief, maar verdere ondersoek en ’n tweede stel diagnostiese toetse het bek-en-klouseer bevestig. Die betrokke veeartsenykundiges ondersoek nou die omvang van die voorval.

Sanparke beklemtoon dat die positiewe uitslae nie op hul eie wys waar die virus vandaan kom, hoe dit versprei het en of daar ’n verband met enige ander uitbreking in die Oos-Kaap bestaan nie. Bek-en-klouseer raak vatbare gespletehoefdiere en hou geen gevaar vir mense in nie.

’n Troppie koedoes in die park. Foto: Facebook/Mandie Elson

Geen gespletehoefdiere mag tans die park binnekom of verlaat sonder toestemming van die toepaslike veeartseny-owerheid nie. Enige toekomstige verskuiwing van vatbare diere sal aan ’n risiko-ontleding, wetlike vereistes en formele goedkeuring onderhewig wees voordat dit kan voortgaan.

Sanparke het ook bioveiligheidsmaatreëls verskerp om die moontlike verspreiding van besmette materiaal te beperk. Voertuie word onder meer ontsmet voordat hulle aangewese wildbesigtigingsgebiede verlaat, terwyl verdere beheermaatreëls ingestel kan word indien veeartseny-owerhede dit aanbeveel of die wet dit vereis.

Die park bly oop vir toeriste en bedrywighede gaan voort binne die vereistes van die siektebeheermaatreëls. 

Besoekers word versoek om alle toegang-, bewegings- en bioveiligheidsvoorskrifte na te kom om die risiko van verdere verspreiding so laag moontlik te hou.

JP Louw, Sanparke-woordvoerder, sê die organisasie werk nou saam met die departement van landbou in die Oos-Kaap en ander rolspelers om die omvang van die voorval vas te stel, wildgesondheid te monitor en toepaslike beheermaatreëls toe te pas.

Kommunikasie met omliggende grondeienaars, veeboere en ander belanghebbendes sal voortgaan sodat voorsorgmaatreëls waar nodig gekoördineer kan word. Verdere openbare opdaterings sal uitgereik word sodra geverifieerde en wesenlike nuwe inligting beskikbaar is.

OFM Agri cvs

• Deel jou landbounuus: agri@ofm.co.za.