Die Brand-gesinslede is Sondag in hul huis op 'n kleinhoewe in die Magogong-gebied naby Hartswater in die Vaalhartsbesproeiingskema aangeval en ontvoer. Elzabie se liggaam is eerste in 'n beboste gebied naby Taung in Noordwes gekry. Van die verdagtes het die plek waar hulle haar liggaam gelos het aan die polisie uitgewys. Haar ouers se liggame is Maandagmiddag gevind. Dit was nie ver van die plek waar Elzabie se lyk dieselfde dag in die vroeë oggendure gekry is nie. Agri Noord-Kaap se president, Nicol Jansen, sê die gemeenskap gaan sigbaar wees en aan 'n protesaksie deelneem in 'n poging om die verdagtes agter tralies te hou. Hier is Jansen...  

Sien onderstaande PODCAST

Hy sê Agri Noord-Kaap ondersteun die gemeenskap van Vaalharts in hul protesaksie by die eerste hofverskyning van dié verdagtes vandag in die landdroshof in Hartswater.  Dit is uiters belangrik dat die gemeenskap dit ook vir die landdros, wat die verhoor hanteer, duidelik moet maak dat die land dit nie verder kan bekostig om verdagtes in moordverhore op vrye voet te laat nie. Daarom ondersteun Agri Noord-Kaap en die gemeenskap nié die vrylating op borgtog van dié verdagtes nie, sê hy.

Suid-Afrika is vasgevang in 'n greep van misdaad en geweld op alle vlakke van die samelewing, dit sluit die landboubedryf, maar ook informele nedersettings, dorpe en stede in. Gemeenskappe, sake-ondernemings en landboubedrywe lei onder die vlaag van misdaad en geweld, en dit is totaal onaanvaarbaar. Volgens Jansen dra dit by tot produsente wat nie ekonomies volhoubaar kan boer nie, terwyl gemeenskappe in vrees leef. 

Hy meen die regering sal nou 'n baie duidelike en doeltreffende standpunt rondom dié kwessie moet handhaaf en toepas, sodat wet en orde in Suid-Afrika herstel kan word.      

OFM-nuus