Hulle is in hegtenis geneem deur die Bohlokong-polisie in samewerking met Bethlehem se eenheid vir openbare orde. Die saak hou verband met ’n sakeroof by ’n snoepwinkel in Bohlokong.

“ ’n Buitelandse sakeman (25) is op 28 November na bewering met ’n vuurwapen gedreig waarna hy van kontant, ’n selfoon en motorsleutels beroof is,” sê ao. Mmako Mophiring, Vrystaatse polisiewoordvoerder.

Die polisie het met die inhegtenisneming ook beslag gelê op ’n ’n ongelisensieerde vuurwapen, ammunisie en gesteelde items. 

Vier verdagtes 

Volgens Mophiring is die slagoffer omstreeks 19:30 in sy snoepwinkel in Bohlokong deur die vier verdagtes oorval. Hulle het later te voet gevlug.

“Byna twee weke later het die polisie inligting ontvang oor die verblyfplek van die verdagtes wat gelei het tot die inhegtenisneming van die eerste verdagte (35) in Bohlokong, sê Mophiring.

Later dieselfde dag het die Bohlokong-polisie inligting oor die oorblywende verdagtes ontvang. Die span het na Uitbreiding 1 in Bohlokong gegaan waar drie verdagtes by ’n huis in hegtenis geneem is.

Ongelisensieerde vuurwapen 

Die vuurwapen is in Phuthaditjhaba as gesteel aangemeld. Die verdagtes sal binnekort in die landdroshof op Bethlehem verskyn.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427

OFM Nuus/Charne van der Merwe dg