Mielies:

Die CBOT-mieliekontrakprys vir die naaste handelsmaand het Dinsdagoggend met 0,39% gestyg.

Amerikaanse mieliepryse het ondersteuning gevind in uiterste warm en droë weerstoestande wat vir die komende weke voorspel word. Dit kan die langtermynopbrengs beïnvloed. Die VSA mielie-oes, vanaf 11 Julie, is 64% in 'n goeie-tot-uitstekende toestand (vorige jaar was 65%). ’n Oorblywende 26% van die oes is in ’n redelike toestand.

Die plaaslike SAFEX-mieliekontrakte het Dinsdag effens afwaarts verhandel vir wit- en geelmieliekontrakte. Die witmieliemark het, vir lewering in Julie 2022, R34/ton (- 0,76%) gedaal om teen R4 435/ton te sluit. Die geelmieliemark het vir lewering in Julie 2022, R52/ton (- 1,17%) laer verhandel om teen R4 390/ton te sluit.

Invoerpariteitspryse vir Amerikaanse geelmielies by die hawe van Durban staan op R6 488,31/ton en uitvoerpariteit op R5 355,28/ton. Die huidige verswakking van die Rand/Dollar-beurs lei tot verhoogde pariteitspryse.

Sojaboon:

Die CBOT-sojaboonkontrakprys vir die naaste kontrakmaand het Dinsdagoggend met 6,64% gedaal.

Amerikaanse sojaboon-oestoestande is na berig word, vanaf 11 Julie, 62% in 'n goeie-tot-uitstekende toestand (vergeleke met die vorige seisoene 59%); 'n verdere 29% word as billik aangewys en 9% arm-tot-baie-arm. Weervoorspellings vir die komende weke is baie warm en droog, dit is 'n bepalende faktor vir opbrengste.

Die binnelandse sojaboonkontrakte het Dinsdagoggend met gemengde tendense verhandel. Die plaaslike sojaboonmark het vir lewering in Julie 2022 met R43/ton (- 0,51%) laer verhandel om uiteindelik te sluit op R8 464/ton.

Invoerpariteitsprys vir Argentynse sojabone by die hawe van Durban staan op R11 823,85/ton en uitvoerpariteit op R9 730,96/ton. Huidige SAFEX-pryse is effens onder die uitvoerpariteitsvlak. Die huidige depresiasie van die Rand/Dollar-beurs lei tot verhoogde pariteitspryse.

Koring:

Die CBOT-koringkontrakprys vir die naaste handelsmaand het Dinsdagoggend 4,05% laer verhandel.

Die VSA is 63% klaar met die oesproses van die winterkoringoes. Die Europese Unie is ook besig met die oesproses - wat bykomende afwaartse ondersteuning verleen. Frankryk, Spanje, Roemenië en Portugal ervaar warm en droë toestande. Amerikaanse lentekoring is 70% in 'n goeie-tot-uitstekende toestand (in vergelyking met die vorige seisoene 16%).

Die binnelandse koringkontrakte het Dinsdag effens afwaarts verhandel. Die plaaslike koringmark het vir lewering in Julie 2022 met R63/ton (- 0,81%) laer verhandel om uiteindelik te sluit op R7 700/ton. Die Desember 2022-koringkontrak het met R105/ton (- 1,41%) laer verhandel om uiteindelik te sluit op R7 330/ton.

Invoerpariteitsprys vir Duitse koring by die hawe van Durban staan op R7 276,69/ton en uitvoerpariteit op R6 045,04/ton. Huidige SAFEX-pryse is effens bo die invoerpariteitsvlak. Die huidige depresiasie van die Rand/Dollar-beurs lei tot verhoogde pariteitspryse.

Vir meer inligting oor die huidige kommoditeitsmark, besoek gerus Graan SA se webtuiste.

OFM-nuus