Mielies:

Die CBOT-mieliekontrakprys vir die naaste handelsmaand het Maandagoggend met 1,13% gestyg.

Wêreldwye graanpryse verhandel tans op aanwysers van weervoorspellings in die VSA en EU, 'n sterker dollar, Swartsee-verskepings, swakker oliepryse sowel as onsekere globale ekonomiese vooruitsigte.

Die plaaslike Safex-mieliekontrakte het Maandag effens opwaarts verhandel vir wit- en geelmieliekontrakte. Die witmieliemark het, vir lewering in Augustus 2022, R17/ton (+ 0,40%) geklim om teen R4 276/ton te sluit. Die geelmieliemark het vir lewering in Augustus 2022, R26/ton (+ 0,61%) hoër verhandel om teen R4 268/ton te sluit. 

Die witmieliemark het, vir lewering in Desember 2022, R26/ton (+ 0,60%) geklim om teen R4 376/ton te sluit. Die geelmieliemark het vir lewering in Desember 2022, R31/ton (+ 0,71%) hoër verhandel om teen R4 396/ton te sluit.

Vir die week geëindig 12 Augustus is 'n totaal van 57 483 ton mielies uitgevoer. Daarvan was 8 083 ton witmielies en 49 400 ton geelmielies. Weer eens oortref die geelmielie-uitvoer die uitvoertempo wat nodig is om plaaslike uitvoervoorspellings vir die 2022/2023-bemarkingsjaar te haal. 

Tans neig kumulatiewe geelmielie-uitvoer bo die vorige seisoene se tempo, sowel as die vyf-jaar gemiddelde pas. Vir witmielies ontstaan daar uitvoergeleenthede. Groot witmielie-uitvoerbestemmings, wat meestal lande suid van die Sahara insluit, ervaar laer produksieskattings, wat 'n ondersteunende hand vir plaaslike witmielie-uitvoer kan verleen.

Sojaboon:

Die CBOT-sojaboonkontrakprys vir die naaste kontrakmaand het Maandagoggend met 0,45% gedaal.

Warmer en droër Augustus-weervoorspellings regoor die VSA kan sojaboonpryse op die kort termyn ondersteun. Amerikaanse opbrengste bly iets om dop te hou. Op die langer termyn kan groot Suid-Amerikaanse oeste pryse onderdruk.

Die binnelandse sojaboonkontrakte het Maandagoggend met effens opwaartse tendense verhandel. Die plaaslike sojaboonmark het vir lewering in Augustus 2022 met R50/ton (+ 0,57%) hoër verhandel om uiteindelik te sluit op R8 850/ton.

Suid-Afrikaanse sojaboonprodusente het reeds 2 104 293 ton aan kommersiële silo's gelewer. Plaaslike produsente het 97,81% van die totale geskatte oes gelewer. Sojaboonlewerings is ver bo die vorige seisoen se lewerings, tot op datum, sowel as die driejaargemiddelde. Dit is te danke aan vanjaar se groot sojaboon-oes.

Koring:

Die CBOT-koringkontrakprys vir die naaste handelsmaand het Maandagoggend 2,98% hoër verhandel.

Wêreldwye graanpryse verhandel op aanwysers van weervoorspellings in die VSA en EU, 'n sterker dollar, Swartsee-verskepings, swakker oliepryse sowel as onsekere globale ekonomiese vooruitsigte. Korttermyn-pryswisselvalligheid duur voort op nuus van Oekraïense graanuitvoer.

Die binnelandse koringkontrakte het Maandag met skerp opwaartse tendense verhandel. Die plaaslike koringmark het vir lewering in Augustus 2022 onveranderd verhandel op R6 850/ton. Die Desember 2022 koringkontrak het met R92/ton (+ 1,35%) hoër verhandel om uiteindelik te sluit op R6 892/ton.

Vir die week geëindig 12 Augustus is 'n totaal van 8 961 ton koring ingevoer, hoofsaaklik uit Australië. Die kumulatiewe totaal van koringinvoer vir die 2021/22-bemarkingsjaar beloop 1 390 106 ton. Die totale koringinvoer vir die 2021/22-bemarkingsjaar maak 94% van die beraamde invoer uit. 

Koringinvoer is tot dusver baie effens hoër as die vorige seisoentempo van 91% en voor die vyf-jaar-gemiddelde van 74%. Reënval in die Swartland en Suid-Kaap kan oor die naweek 'n bietjie broodnodige vog vir die huidige koringoes lewer.

Vir meer inligting oor die huidige kommoditeitsmark, besoek gerus Graan SA se webtuiste.

OFM-nuus