’n Nuwe biodieselbeleid in Amerika gaan pryse vir sojabone verhoog terwyl pryse vir soja-oliekoek op lang termyn verlaag word.

Die Amerikaanse Departement van Landbou se Buitelandse Landboudiens (FAS) berig die groeiende Amerikaanse vraag na sojaboonolie, aangedryf deur lae-koolstofbrandstofmandate, sal voortgaan om die uitvoer van sojaboonolie in die 2023/24-boekjaar te onderdruk. Dit sal die handelsgaping vergroot en Amerika uit die wêreldwye uitvoermark vir sojaboonolie stoot.

Agata Kingsbury, 'n senior ekonoom by die FAS, sê Amerika was tot onlangs 'n groot verskaffer van sojaboonolie. 

Uitvoer het 'n hoogtepunt van 1,5 miljoen ton in 2009/10 bereik en gemiddeld 1 miljoen ton tussen 2010 en 2021.

Die goeie nuus vir veeprodusente is dat die beskikbaarheid van soja-oliekoek in die wêreldmark gaan toeneem, wat afwaartse druk op pryse sal plaas.

Landbou-investering te midde van ekonomiese onsekerheid

Sindira Chetty, digitale redakteur by Farmer's Weekly, sê toenemende uitdagings en onsekerheid in die landbousektor lei tot verminderde investering.

Tendense toon dat boere goedkoper korttermynoplossings kies aangesien onsekerheid oor hul toekomstige waarskynlikhede heers.

Terwyl die Agbiz/IDC Agribesigheidsvertrouensindeks vanaf die tweede kwartaal in 2023 met ses punte teruggespring het tot 50 punte in die derde kwartaal, het die indeks vir drie opeenvolgende kwartale onder die 50-punt-kerf gebly.

Lesings bo die neutrale 50-punt merk beteken dat landboubesighede optimisties is oor saketoestande in Suid-Afrika.

Wandile Sihlobo, hoofekonoom by Agbiz, sê die jarelange probleme van verswakking in munisipaliteite, haglike toestande van paaie, stygende misdaad en beurtkrag bly groot uitdagings wat die sektor se langtermyngroei kan ondermyn.

OFM Nuus/Elsabé Richard-May daphné/corne