Wandile Sihlobo, hoof-ekonoom van landbousakekamer, Agbiz, meen egter voedselpryse sal weer normaliseer. Hy verduidelik in sy weeklikse potgooi watter rol die uitbreking van voëlgriep, aartappelpryse asook die prys van sagte vrugte op voedselinflasie het.

“Dit was nie uniek aan Suid-Afrika nie, maar 'n wêreldwye verskynsel wat deur verskeie faktore ondersteun word, insluitend die droogte in Suid-Amerika, China se sterk vraag na graan en oliesade, hoër energiepryse, en onder meer die Rusland-Oekraïne-oorlog,” sê Sihlobo.

Produkpryse begin afplat

‘n Positiewe verwikkeling was dat vanaf Maart 2023, het Suid-Afrika se verbruikersvoedselprysinflasie begin verlangsaam, van 14,4% tot 8,0% in September 2023. “Die produkpryse wat hierdie verlangsaming deur hierdie tydperk ondersteun het, was hoofsaaklik brood en graan, vleis, vis, en olies en vette.”

Oktober 2023 het egter hierdie ses maande van opeenvolgende dalings ontwrig, met Suid-Afrika se verbruikersvoedselinflasie wat versnel het tot 8,8%, van 8,0% in die vorige maand. “Die produkpryse wat tot hierdie styging bygedra het, was hoofsaaklik melk, eiers en kaas, vrugte, en groente.”

Sihlobo meen egter die onlangse prysstygings vir al hierdie produkte sal waarskynlik net 'n tydelike terugslag wees. “Dit is 'n reaksie op kort aanbodbeperkinge die afgelope paar maande.”

Invloed van voëlgriep verslap

Die uitbreking van voëlgriep het tot beperkings in die aanbod van eiers gelei, wat steeds 'n uitdaging bly, hoewel nie so ernstig soos in September en Oktober nie. Wat groente betref, was aartappels hoofsaaklik die aandrywer van pryse aangesien die oes beperk was ná besproeiingsonderbrekings in sommige lande as gevolg van beurtkrag in groot dele van die jaar se eerste helfte.

“Maar met die ingrypings in die pluimveesektor, soos die invoer van bevrugte eiers om broeihoenders wat weens voëlgriep verloor is, te herbou, en die invoer van tafeleiers (poeier- en vloeibare eiers wat in die bakproses gebruik word), asook die deurlopende prosesse oor die moontlike inentings om die verspreiding van die siekte te bekamp, is ek hoopvol dat die pryse waarskynlik in die komende maande sal normaliseer,” meen Sihlobo.

Hy verduidelik ook dat eiers 'n laer gewig binne die voedselinflasiemandjie het (0,4%), wat beteken dat hul impak dalk nie so beduidend is in 'n algehele inflasiesyfer nie.

“Ek verwag 'n soortgelyke herstel in groente- en vrugtevoorrade in die komende maande, wat sal help om die huidige opwaartse prysdruk te verlig. Die beurtkrag het ietwat verminder, en boere het in alternatiewe energiebronne belê, wat nuttig is vir produksietoestande,” sluit Sihlobo af.

Die oorspronklike artikel het eerste verskyn op https://wandilesihlobo.com/ Corné