Hul gefokusde portefeulje van mielie-, sonneblom-, sojaboon- en graansorghumkultivars word verder ondersteun deur die Panagri^TM navorsingsprogram – ’n praktiese uitbreiding van hul verbintenis tot slim plaasbestuur.

Volgens De Bruyn Myburgh, hooflandboukundige by Pannar Saad met ’n honneursgraad in grondkunde van die Universiteit van die Vrystaat en meer as 11 jaar se praktiese ondervinding, het die Panagri^TM konsep ontstaan ná ’n 2010-studietoer deur Pannar wetenskaplikes na die VSA. 

“Ons het besef dit is nie genoeg om net topsaad te verskaf nie. Ons moet ook boere ondersteun om daardie genetika optimaal op hulle eie plase aan te wend.”

Die Panagri^TM-program sluit verskeie soorte proewe in. “Ons P3-proewe toets nuwe genetiese lyne teen gevestigde produkte onder werklike plaasomstandighede, waar produkplasingsproewe ons help verstaan hoe ’n nuwe kultivar reageer op bestuurspraktyke, klimaatsverskille en streekstoestande.” 

Pannar neem ook deel aan onafhanklike sy-aan-sy en multistrookproewe waar hul produkte vergelyk word met dié van mededingers, alles onder dieselfde toestande.

“Hierdie databasis is ons kern – dit gee ons die wetenskaplike grondslag om streekspesifieke aanbevelings te maak. Omdat Pannar se eie span self op die plase werk, kry produsente direkte toegang tot deeglike advies en ondersteuning.”

In hoëpotensiaalgebiede soos Noordwes en die Vrystaat is Pannar tans besig met intensiewe produkplasingsproewe op watertafelgronde. 

“Hier toets ons hoe kultivars reageer op presiese plantestand, bemestingsvlakke en grondsamestelling. Reeds in die vroeë fases sien ons interessante resultate wat opbrengs, graankwaliteit en staanvermoë beïnvloed.”

Hy sluit af: “Ons wil alle boere bedank wat hul plase beskikbaar stel vir proewe. Sonder hulle sou hierdie unieke navorsingsbenadering nie moontlik gewees het nie.”

Met bykans 70 jaar se ondervinding, is Pannar steeds ’n betroubare vennoot wat wetenskaplike vooruitgang en agronomiese insig saamspan met boereraad om praktiese, plaasgefokusde oplossings te bied.