Dit kom nadat die universiteitsbestuur die kampus se bestaande SR ontbind het. NWU-woordvoerder, Koos Degenaar, sê die nege oorblywende SR-verteenwoordigers is Vrydag ingelig dat die bestaande struktuur ontbind gaan word nadat hulle deelgeneem het aan die onlangse ontwrigtings op kampus. Dit het die registrasieproses en bywoning van klasse beïnvloed.

Die protesoptredes verlede week was teen die NWU se besluit om die SR-voorsitter, Benz Mabengwane, in die begin van die jaar te skors.  

Degenaar sê die grondwet dui duidelik aan dat lidmaatskap van die SR opgeskort sal word as hulle nie hul gewone pligte nakom nie. Daarmee saam het die SR-verteenwoordigers ook ‘n hofinterdik wat duidelik aangedui het dat studente nie aan optogte kan deelneem wat verrigtinge op kampus ontwrig nie. Die verteenwoordigers het aan protesoptogte saam met stundente van ander kampusse deelgeneem. Volgens Degenaar is dit duidelik dat daar ‘n gebrek aan leierskap by die bestaande SR is.

Degenaar sê die SR bestaan uit 12 verteenwoordigers.

Mabengwane is geskors hangende ‘n dissiplinêre verhoor. Hy het glo ‘n rol gespeel in die ontwrigting van die registrasieproses en ‘n klag van aanranding word ook teen hom ondersoek. Mabengwane het verlede jaar twee SR-verteenwoordigers geskors wat versuim het om hul pligte na te kom.

OFM-nuus