Die Nasionale Plaasvaardighedekompetisie, beter bekend as Farm Skills, bring vanjaar sowat 370 leerders van 19 skole bymekaar. Die kompetisie het in 2023 met 160 leerders van sewe skole begin en groei sedertdien tot ’n belangrike toonvenster vir praktiese landbou-onderwys.

EP Nel, Vrystaatse landbouvakadviseur en voorsitter van die Suid-Afrikaanse Landbou-onderwysvereniging, sê die kompetisie spruit uit die praktiese vereistes van vakke soos landboutegnologie en landboubestuurspraktyke. Praktiese werk maak 25% van graad 10-, 11- en 12-leerders se jaarpunt in dié vakke uit.

Die kompetisie toets daarom nie net teoretiese kennis nie, maar ook die vermoë om vaardighede in werklike situasies toe te pas. Leerders neem onder meer deel aan sweiswerk, trekkerbestuur, foutopsporing, spuitkalibrering, omheining en die ontwikkeling van nuwe plaastoerusting wat op ’n plaas van praktiese waarde kan wees.

Die sweiskompetisie gaan byvoorbeeld verder as die las van twee stukke metaal. Deelnemers moet ’n pypkar beplan en bou wat eindelik getoets en gery word, wat volgens Nel ook gou wys of die ontwerp, stuurstelsel en ander onderdele werk soos wat die leerders beplan het.

Veevaardighede maak ook ’n groot deel van Farm Skills uit. Leerders word getoets op onder meer bees- en skaapseleksie, veehantering, dieregedrag en siektetekens, terwyl veilige optrede rondom diere besondere aandag kry. Die doel is dat leerders potensiële gevaartekens moet kan herken voordat ’n dier aggressief optree.

Die kompetisie help terselfdertyd om seker te maak dat die praktiese komponente van die landboukurrikulum werklik by skole aangebied word, sê Nel. Dit bied ook aan leerders wat Nampo aan praktiese werk bestee ’n geleentheid om hul vaardighede voor ander skole, die landboubedryf en die publiek ten toon te stel.

Nampo Alfa bied juis die regte platform omdat dit skole met die breër landboubedryf verbind. Vorige kompetisies het reeds belangstelling van ondernemings gelok wat moontlike toekomstige werknemers onder deelnemers raakgesien het, veral leerders wat sterk gevaar het in die sweis- en tegniese afdelings.

Die kompetisie kan nog verder groei en eindelik meer geleenthede vir jong mense skep, meen hy. Benewens die onderlinge kompetisie tussen skole, bou dit selfvertroue, stel dit leerders aan nuwe vaardighede bloot en versterk dit die bande tussen landbouskole en moontlike toekomstige werkgewers.

OFM Agri sm

• Deel jou landbounuus: agri@ofm.co.za.