Die geelbaadjiebeweging, les gilets jaunes, het pas ’n tweede fase van betogings vir Saterdag (24/10) aangekondig, en nog ’n ronde protesoptrede word die daaropvolgende week beplan. Die doel is om “die momentum aan die gang te hou” tot die groot betoging wat vir 5 November beplan word, berig The Guardian.

Dié ergste betogings in Frankryk se geskiedenis oor onder meer die hemelhoë lewenskoste het ook na Italië versprei. Giorgia Meloni, Italië se eerste minister, hou Maandag ’n krisisvergadering met senior veiligheidsbeamptes oor die plundering en verwoesting.  

Sébastien Lecornu, die Franse eerste minister, sê ná ’n kabinetsvergadering  gedeeltelike aandklokreëls sal plek-plek ingestel word om orde te herstel. Geld gaan ook beskikbaargestel word vir die bestryding van die onrus. Voorts sal meer polisiebeamptes uitgeplaas word.

Sébastien Lecornu, Frankryk se eerste minister. Foto: Wikimedia

Hy belowe geldelike hulp aan ondernemings en gebiede wat deurgeloop het, en sê dié geld sal verhaal word van diegene wat vir die geweld verantwoordelik is.

Vroeër het die minister van binnelandse sake erken die polisie het in sommige stede beheer verloor. Laurent Nunez se erkenning het gekom te midde van toenemende kritiek op die veiligheidsmagte se optrede. 

Die betogings het verlede maand in Frankryk begin as studenteprotes oor toestande in skole. Sedertdien het dit uitgebrei as ‘n uitlaatklep vir mense se ontevredenheid oor die lewenskoste, probleme met openbare dienste en omstrede regeringsbeleid.

Oor kritiek op die polisieoptrede sê Lecornu dit is ’n wonderwerk en ’n getuigskrif vir die professionaliteit van die polisie dat niemand hul lewe verloor het in die naweek se gewelddadige voorvalle nie.

Laurent Nunez, Frankryk se minister van binnelandse sake, is in die spervuur oor die regering se hantering van die onrus. Foto: Africa Intelligence

Meer as ’n halfmiljoen mense het Saterdag oral in Frankryk betoog, veel meer as die 200 000 wat die regering verwag het. Die veiligheidsbeplanning was onvoldoende vir dié omvang en dit het gelei tot chaos in verskeie stede.

Nunez gee toe daar was tekortkominge in die polisie se voorbereiding en intelligensie-insameling. Hy het selfs sy bedanking by pres. Emmanuel Macron ingedien omdat hy hom verantwoordelik hou vir die gebeure. 

Die Franse president het egter geweier om dit te aanvaar en hom opdrag gegee om nuwe maatreëls in te stel om die situasie te stabiliseer en plunderaars vinniger voor die gereg te bring, berig BBC News.

’n Polisiebeampte op die toneel van ’n geplunder in Napels. Skermgreep: X

Saterdag was een van die gewelddadigste dae van onrus in jare. Openbare geboue het in vlamme opgegaan, terwyl honderde winkels beskadig of geplunder en minstens 2 400 verdagtes in hegtenis geneem is. 

Sondag het die onrus voortgeduur. In Parys alleen is meer as 350 mense in hegtenis geneem nadat winkels geplunder is.

Burgemeesters van Parys, Lyon en Marseille voer aan hul stede is plek-plek feitlik onbeskermd gelaat. Hulle eis ’n onafhanklike ondersoek na die polisie se hantering van die onrus en vra waarom plundering soms langer as ’n halfuur kon voortduur sonder enige ingryping. 

Politieke ontleders waarsku dat die gebeure ’n ernstige waarskuwing is vir Frankryk met die oog op toekomstige verkiesings en moontlike botsings tussen verregse en ver-linkse groepe.

Terwyl Frankryk nog probeer herstel, het die onrus reeds na Italië oorgespoel, berig The Guardian. In Milaan het die polisie met betogers gebots nadat groepe winkelvensters stukkend geslaan, die geboue geplunder en voorwerpe aan die brand gesteek het. Traangas en waterkanonne is gebruik om die skares uiteen te dryf.

In Suid-Italië het vragmotorbestuurders hoofpaaie versper uit protes teen stygende brandstofpryse. Die padblokkades het reeds tot brandstoftekorte by honderde vulstasies gelei, terwyl supermarkte en selfs apteke tekorte aan noodsaaklike produkte begin aanmeld.

OFM Nuus

• Het jy ’n nuuswenk om te deel? Bel of whatsapp die OFM Nuus-lyn 066 487 1427.